Imewekwa: 28^th February, 2019

Wafugaji wa maziwa mkoani Tanga wametakiwa kupanda malisho kwa wingi ili kuwasaidia kuzalisha maziwa mengi wakati wote.

Hayo yalisemwa jana na Kaimu Msajili wa Bodi ya Maziwa Dkt. Sophia Mlote wakati wa kikao cha pamoja kati ya Bodi ya Maziwa Tanzania na vyama vya msingi vya mkoa wa Tanga wakati wa kujadili mchakato wa kuwawezesha wafugaji wa mkoa wa Tanga kununua mitamba 350 kwa njia ya mikopo yenye masharti nafuu kutoka Benki ya Maendeleo ya Kilimo (TADB).

Bodi ya maziwa iliingia makubaliano rasmi na Benki ya Maendeleo ya Kilimo Tanzania, kwa lengo la kuviwezesha vyama vya ushirika vya wafugaji wa ng’ombe wa maziwa nchini kuwapatia mafunzo ya ufugaji bora na mikopo nafuu kwa nia ya kuendeleza tasnia ya maziwa. Aidha, Mikopo kutoka TADB itahusisha ununuzi wa ng’ombe bora wa maziwa, ujenzi wa mabanda, ununuzi wa pembejeo kama vyakula na dawa za mifugo.

Dkt. Mlote ametoa wito kwa wafugaji kuhakikisha kuwa kila mfugaji anaanzisha shamba la malisho kwa ajili ya mifugo aliyonayo. Aidha, Wafugaji waliitikia wito wa Bodi na Wizara kwa kuomba maeneo yaliyofutiwa hati katika mkoa wa Tanga kama Amboni Estate, Marungu, Kibaranga n.k kutengwa kwa ajili ya ngo'mbe wa maziwa ili wafugaji wapate maeneo ya kuanzisha mashamba ya malisho ya mifugo.

Kikao hicho kilihudhuriwa na vyama mbalimbali vya wafugaji vya mkoa wa Tanga ambavyo vipo chini ya mwavuli wa Tanga Dairy Cooperative Union (TDCU). Kwa mujibu wa taarifa ya Mwenyekiti wa TDCU, katika mkoa wa Tanga kuna jumla ya vyama 26 na kati ya hivyo, vyama viwili vya Umoja wa Wafugaji Mwangoi (UWAMWA) na Chama cha Ushirika wa Wafugaji Ng’ombe wa Maziwa Muheza (CHAWAMU) ndivyo vilivyokamilisha mchakato wa kupata mkopo toka Benki ya Kilimo.

Dkt. Mlote, amesema kuwawezesha wafugaji mitaji ni moja ya mikakati madhubuti inayofanywa na bodi ya maziwa kuwawezesha wadau kuwa karibu na huduma za kibenki ili kuweza kujiinua kiuchumi.

Aidha, Msajili alisema kuwa wafugaji hawana budi kutumia fursa hii ili kuongeza uzalishaji wa maziwa hapa nchini na kuviwezesha viwanda vya kusindika maziwa kuzalisha kwa uwezo uliojengewa. Mpaka sasa uzalishaji wa maziwa kwa nchi nzima ni lita bilioni 2.4 tu. Kwa uzalishaji huu, ulaji wa maziwa kwa mtu kwa mwaka ni lita 47 kinyume na matakwa ya shirika la chakula duniani linalomtaka kila mtu anywe maziwa lita 200 kwa mtu kwa mwaka.

Changamoto kubwa za ufugaji wa ng’ombe wa maziwa ni malisho duni, magonjwa na elimu ndogo ya ufugaji na isiyozingatia kanuni bora wa ufugaji. Hali hii inasababisha kushuka kwa kiwango cha uzalishaji wa maziwa hata kama mfugaji atakuwa na ng’ombe bora.

Bodi ya maziwa iliahidi kuendelea kutoa elimu kwa wafugaji wa maziwa kwa kushirikiana na taasisi nyingine mtambuka ili kuwasaidia wafugaji kuzalisha maziwa bora na kwa wingi zaidi.

Hatua hii imefikiwa ili kukamilisha mchakato wa zoezi kubwa la kuwakabidhi wafugaji wa mkoa wa Tanga mitamba bora yenye mimba kwa ng’ombe wa maziwa. Zoezi hili linatarajiwa kufanyika hivi karibuni na Waziri mwenye dhama ya mifugo, Mhe. Luhaga Joelson Mpina.