Katika hatua inayotajwa kuwa ya kimkakati kwa maendeleo ya tasnia ya maziwa nchini, Kiwanda cha ASAS kilichopo mkoani Iringa kimefungua milango yake kwa Meneja Uendeshaji kutoka Benki ya Dunia, Bi. Frauke Jongbluth, aliyefanya ziara maalum tarehe 19 Februari, 2026, kujionea shughuli za uzalishaji na kujadili fursa za ushirikiano.

Ziara hiyo imeibua matumaini mapya ya kuimarishwa kwa ushirikiano kati ya taasisi za maendeleo na sekta binafsi, hususan katika kuongeza thamani ya maziwa, kupanua masoko na kuchochea ajira kupitia uwekezaji wa viwanda.

Katika kikao cha pamoja kilichofanyika  kiwandani hapo, pande hizo zilijadiliana kuhusu changamoto zinazoikabili tasnia ya maziwa ikiwemo upatikanaji wa malighafi kwa wingi na ubora unaotakiwa, gharama za uzalishaji pamoja na fursa za upanuzi wa masoko ya kikanda. Mazungumzo hayo yalilenga kutafuta njia bora za kuimarisha mazingira ya uwekezaji na kuongeza ushindani wa bidhaa za maziwa kutoka Tanzania.

Akizungumza katika kikao hicho, Bi. Jongbluth alisisitiza umuhimu wa kuwekeza katika mifumo ya ukusanyaji wa maziwa vijijini na kuwajengea uwezo wafugaji wadogo ili kuongeza uzalishaji wenye tija. Alibainisha kuwa ukuaji wa tasnia hiyo unategemea uimara wa mnyororo mzima wa thamani kuanzia ngazi ya mfugaji hadi kiwandani.

Kwa upande wake, Mkurugenzi wa ASAS, Bw. Fuad, alieleza kuwa kampuni hiyo imeweka mikakati ya muda mrefu ya kuongeza ushirikiano na vikundi vya wafugaji, kuboresha miundombinu ya uhifadhi wa maziwa na kuwekeza katika teknolojia rafiki kwa mazingira. Alisema dhamira ya ASAS ni kuwa kinara wa ubora na ubunifu katika sekta ya maziwa nchini.

Naye Msajili wa Bodi ya Maziwa Tanzania alisema Bodi ina jukumu la kusimamia na kuratibu maendeleo ya tasnia hiyo kwa kushirikiana na wadau wote, wakiwemo wawekezaji kama ASAS. Alieleza kuwa kupitia miongozo, usimamizi wa viwango na programu za uhamasishaji wa matumizi ya maziwa, Bodi inalenga kujenga tasnia imara, yenye ushindani na inayowanufaisha wafugaji pamoja na walaji.

Ziara hiyo imeelezwa kuwa ni mwanzo wa mazungumzo ya kina zaidi yatakayoweza kuzaa ushirikiano mpana katika maeneo ya uwekezaji, uendelezaji wa ujuzi na upanuzi wa soko, hatua inayotarajiwa kuongeza mchango wa sekta ya maziwa katika pato la Taifa.